المهدئ مش بسكويت او عصير
لو اخدت مهدئ مرة ورا مرة .. خلاص اتعودت عليهوعمرك ما هتقدر توقفه الا بصعوبة
لازم تسال نفسك انا ليه عايز مهدئ
نفسيتك تعبانة .. اتكلم مع حد وفضفض وطلع اللى جواك .. هترتاح وهتحس ان فيه حمل تقيل اتشال من عليك والاهم ان الشخص اللى بتتكلم معاه هيساعدك ازاى حياتك تبقى احسن الفترة اللى جاية
كمان انا عيزك تتمشى نص ساعة كل يوم .. اتمشى بس .. متفكرش فى حاجة .. اتمشى للاستمتاع .. كأنك ماشى فى شارع هادى مليان شجر .. تخيل كده منظر الاشجار .. بعد ما ترجع البيت هتحس براحة
فكرت قبل كده تقرا كتاب قبل ما تنام .. جرب كل يوم انك تقرا 5 صفحات من كتاب واليوم اللى بعده اقرا 5 صفحات تانية وهكذا لحد ما تخلص الكتاب .. وانت بتقرا هتلاقى نفسك عايش جوه القصة .. هتلاقى نفسك مستمتع .. نفسيتك هترتاح
فكرت قبل كده انك ترجع تمارس الهواية اللى كنت بتحبها زمان .. يعنى مثلا كنت بترسم .. ليه بطلت ترسم .. كنت بتكتب قصص .. ليه بطلت تكتب قصص .. ارجع مارس الهواية اللى بتحبها .. جرب .. نفسيتك هترتاح اكتر
فكرت قبل كده انك تتفق مع اصحابك انكم تعملوا يوم كل اسبوع تتقابلوا فيه .. تتكلموا وتهزروا وتضحكوا وتعملوا كل حاجة بتحبوها .. مش بقولك يوم بالكامل .. ممكن مثلا تتقابلوا ساعتين او تلات .. جرب انك تعمل كده .. نفسيتك هترتاح اكتر
استمتع بحياتك .. الحياة حلوة
ليست هناك تعليقات:
إرسال تعليق