عايش يوم بيوم .. مش فارق معاك حاجة
ممكن تضحك .. بس ضحكة مطفية
اخدت صدمات كتيرة فى حياتك
فقدت الثقة فى اقرب الناس ليك
مش حاسس بالامان
حاسس انك لوحدك .. مع انهم حواليك .. بس مش شايفهم
حاسس انك لو حصلك حاجة محدش هيسندك
فكرت انك تعمل حاجات مش حلوة .. بس تراجعت عنها .. عشان انت من جواك مش عايز كده .. انت من جواك مش حابب كده
لازم تفوق ... الافكار السلبية مسيطرة عليك .. انت شخص جميل .. عندك حاجات حلوة كتيرة مش موجودة عند حد .. ممكن تكون اخدت صدمات .. بس الصدمات بتعلمك .. لولا الصدمات كان ممكن تخسر كتير .. مكنتش هتشوف الحقيقة .. مع ان قبلها كانت فيه اشارات بتجيلك وتقولك خلى بالك .. بس انت مكنتش عايز تشوف .. الصدمة مش بتيجى علطول .. الصدمة بتبعت ليك اشارات قبلها
اقرب الناس ليك مش كلهم وحشيين .. ممكن يكون البعض منهم حلو .. فكر .. هتلاقى انهم عملوا حاجات حلوة ليك .. هتقولى عملوا حاجات مش حلوة .. هقولك مفيش حد بيعمل طول الوقت حاجات حلوة .. اكيد فيه حاجات بتبقى مش حلوة كل فترة .. حط قدامك الحاجات الحلوة اللى عملوها .. والحاجات اللى مش حلوة .. وقرر بعديها .. هتلاقى انهم شخصيات حلوة .. وهتلاقى بعضهم هيسندك فى وقت الشدة .. وفيه اشخاص كلموك كذه مرة وحاولوا يساعدوك وانت رفضت مساعدتهم .. ولما شافوا انك مش حابب تتعامل معاهم .. بعدوا عنك
كل يوم بيمر .. ده من عمرك .. هتقعد حزين طول الوقت .. انت اللى هتخسر .. انت اللى هتنطفى .. انت اللى هتتعب .. تعب نفسى وبعديها هيبقى جسدى .. اخرج .. بلاش تقعد كتير مع نفسك .. اشغل نفسك فى حاجات بتحبها
اتمشى ساعة يوميا
اقرا كتاب وبعد ما تخلصه .. هات ورق واكتب فيه ايه اللى استفدته
العب يوجا
ارسم .. حتى لو شخبطة
العب رياضة
اشترك فى انشطة
المهم اشغل نفسك
دايما كل اسبوع حاول تعمل حاجة جديدة .. بعديها هتلاقى كل الافكار الحلوة بتجيلك .. والافكار السلبية هتختفى
ليست هناك تعليقات:
إرسال تعليق