- المحل دة جامد جدا ، صفحة الفيسبوك هتفيدك جدا ، المطعم دة بيعمل أكل رهيب .. جربه ومش هتندم !!
مين فينا مبيسمعش الكلام دة من اصحابه أو قرايبه ؟؟ كل يوم بنسمع اشادات وتوصيات اننا نجرب مطاعم، محلات لبس، محلات أكل وهكذا وده اسمه التسويق بالكلام أو التسويق الشفهي وهو نوع من أنواع التسويق الشهيرة
طيب يعنى ايه التسويق الشفهي ؟؟
التسويق الشفهي هو عبارة عن نوع من انواع العمليات الترويجية الغير مكتوبة سواء مسموعة أو مرئية واللي بيحصل فيه إنك بتلاقي واحد من اصحابك اشترى لبس من براند معين وعجبه فبيحكيلك عليه وبيبتدي يمدح في المحل ده وبالتالي الكلام بيشدك جدا وبيثير إهتمامك وبتقرر انك هتروح تشوف جودة منتجات المحل بنفسك ولو عجبك هتبدأ انت كمان تسوق للمكان ده وده يعتبر تسويق مجانى من عملائك ليك
هل التسويق الشفهي مهم للبراند ؟
اسلوب التسويق الشفهي بيعتمد بنسبة كبيرة جدا على علاقة العميل وثقته في البراند اللي بيتعامل معاه والثقة دى هى اللى بتخليه يتكلم ويعرف اصحابه وقرايبه عن البراند وبكده بيكون عملائك هم المسوقين للبراند بتاعك لكن ده بيتوقف على جودة المنتج لان التسويق الشفهي نوعين :
النوع الاول : انك بتمدح المنتج ودى دعاية إيجابية
النوع الثاني : انك بتذم المنتج أو بالعربي بتتكلم عن البراند بصورة سيئة وده بسبب رداءة المنتج أو سوء الخدمة ودى دعاية سلبية
طيب ايه هو أفضل مثال بيعبر عن التسويق الشفهى ؟
اكبر مثال حي على استخدام البراندات للتسويق الشفهي هو LC Waikiki اللي عمرنا ما شوفنا اعلاناته على الفيسبوك ولا التليفزيون ولا الراديو ولا اي حاجة خالص بس بيعتمد دائما على التسويق الشفهي من خلال تقديم جودة مميزة وسعر في المتناول للمستهلك
طب ازاي اخلي العملاء يتكلموا عني ؟؟
1- تقديم منتجات عالية الجودة مع التركيز على تجربة العميل للمنتج لان رأي العميل هو المهم
2- خدمة ما بعد البيع من الحاجات الاساسية والمهمة اللى بتفرق مع العميل ومن المهم معرفة رأى العميل عن الخدمة ككل من خلال طلب تقييم الخدمة أو المنتج زى ما كتير من المطاعم بتعمل والاهم انك تحاول تشتغل على تعليقات العملاء دى وتحسن من منتجك وجودته لان ده بيحسس العميل ان صوته مسموع وواصل
3- استخدم وسائل جذب العملاء من خلال عمل الخصومات والسحب على شراء عدد من المنتجات مع عمل هدايا قيمة لان الهدايا من العوامل المحفزة جدا ان العميل يتكلم كويس عليك
4- اتعامل مع عملائك بصدق في توضيح نقاط القوة والضعف إن وجدت في منتجك عشان صراحتك مع العميل هتجبره على احترامك
5- حاول تفكر في طرق ابداعية لتقديم منتجك أو لفكرة جديدة لعميلك لان بكده هيفضل منتجك مميز فى ذهن العميل
مع تنفيذ كل النقاط الموجودة فوق هتقدر تستحوذ علي ثقة أى عميل و ده مش هيمنع حدوث أخطاء لكن مبادرتك بالاعتذار وحل المشكلة هتكون سبب أساسي فى ثقة عملائك وده اللى هيخليهم من أهم المسوقين ليك
ليست هناك تعليقات:
إرسال تعليق