ندم على اختيارات من سنين طويلة وبسببها عاش حياة مش حلوة .. بيتمنى لو يرجع بيه الزمن لورا عشان يختار صح
لما اخترت زمان كان فكرك فى وقتها محدود شوية .. مكنش عندك خبرات .. ولو رجع بيك الزمن لورا .. ممكن تختار حاجات تانية وتلاقى نفسك مش سعيد .. كل حاجة ليها مميزاتها وعيوبها .. مفيش حاجة حلوة طول الوقت .. ممكن يكون اللى انت فيه دلوقتى حلو .. بس انت مش حاسس بقيمته لانه فى يديك .. لكن الحاجات التانية مش فى ايديك .. عشان كده فاكر انها حلوة وهى عادية جدا
بلاش تفكر فى الماضى .. اللى حصل حصل خلاص .. مش هتعرف تغيره .. لكن اللى جاى تقدر تغيره .. لازم نظرتك للحياة تتغير ... عشان تشوف حاجات حلوة فى الحياة
لو عايز تغير حياتك .. ابدأ من دلوقتى ... هتقولى انا كبرت و مليش نفس اعمل حاجة .. فيه ناس بيبقى عندها 80 سنة وتلاقيها عايشة حياتها ومبسوطة .. مش بيحبوا النكد .. وتلاقى صحتهم حلوة .. والناس تسال حد منهم بتاكل ايه .. بتشرب ايه .. عشان تفضل شباب طول الوقت ومش شايل هم .. يقولهم باكل زيكم .. بس الاختلاف انى مش بحب النكد .. بحب اضحك واهزر .. بحب استمتع بحياتى .. مش بحب اشيل هم حاجة .. الحياة مليانة مشاكل .. بس انا مش بركز معاها .. عندى حل للمشكلة .. احلها .. معنديش .. اسيبها على جنب .. لحد ما الحل يجى .. مش بزعل من حد .. لان معرفش ظروفه ايه .. مقدرش احكم ليه عمل كده .. ومش بفكر ..
الحاجة الوحيدة اللى بفكر فيها .. ازاى ابقى مبسوط كل يوم .. اقعد افكر ايه الحاجات اللى بتخلينى مبسوط .. اكتبها فى ورقة .. وانفذها تانى يوم .. بحس انى فى عيد .. بحس انى شباب .. كل يوم اعمل حاجات مختلفة .. معظم الحاجات اللى بعملها مش محتاجة ماديات ..... عيش حياتك واسعد نفسك واستمتع بوقتك
ليست هناك تعليقات:
إرسال تعليق